A ruta dos Muíños do Folón e do Picón pechou o calendario de andainas entre A Guarda e Caminha

As andainas organizadas pola Cámara Municipal de Caminha e o Concello da Guarda co obxectivo de coñecer a paisaxe e o patrimonio da comunidade galega e o país veciño, remataron na xornada do pasado sábado coa Ruta dos Muíños do Folón e do Picón.

O peche do calendario deste ano 2018 realizouse nas terras veciñas rosaleiras coa ruta de 18 km polos Muíños do Folón e do Picón.

Os Muíños do Folón e do Picón son un grupo de 60 muíños en fervenza, declarados Ben de Interese Cultural, ao constituír parte do rico patrimonio etnográfico, xa mencionados en documentos do século XVII. Recorrido de gran beleza con excelente panorámicas ao val do Rosal e Esteiro do Miño. Tamén se coñeceu a Capela na véspera da celebración de San Martiño.