A XXXIII edición da Semana de Cine Submarino da Universidade de Vigo comeza o martes 18 de novembro ás 20:00 horas no Auditorio Teatro Afundación, cun programa que invita a mergullarse nas múltiples caras do océano, desde a súa fraxilidade ambiental ata o seu inmenso patrimonio arqueolóxico.
A sesión inaugural comeza coa proxección da curtametraxe «O océano non é noso», do realizador Xaime Beiro, unha peza que convida a reflexionar sobre a relación humana co medio mariño e a necesidade de protexelo.
A continuación, o público poderá gozar dunha selección de vídeos do Instituto Balear de Estudos en Arqueoloxía Marítima (IBEAM), entre os que se incluirán «Frágil, preservando o invisible», «Profundidades de Ibiza» e «El pecio de Ses Fontanelles». Estes traballos poñen o foco na importancia da conservación do patrimonio subacuático e nas historias ocultas que permanecen baixo as augas do Mediterráneo.
As proxeccións rematarán co documental «El futuro del océano», do produtor e director Mario Cuesta, unha obra que analiza os desafíos ambientais que afrontan os ecosistemas mariños e as posibles vías para garantir a súa supervivencia nun planeta en cambio constante.
Como cada ano, a Semana de Cine Submarino acompaña as súas proxeccións cun espazo para o diálogo. Nesta ocasión, a convidada ao coloquio será Rosa Figueroa, directora do Instituto Español de Oceanografía.
A entrada a todas é libre e gratuíta ata completar a capacidade do auditorio, o que converte este evento nun encontro aberto para quen desexe achegarse ao mar a través da mirada do cinema.