O grupo municipal do Bloque Nacionalista Galego en Oia leva «anos denunciando o depósito ilegal de residuos sólidos da parroquia de Mougás. Ademais de non ter amparo legal, as queixas son provocadas porque estes depósitos están producíndose preto dun espazo dedicado á actividade deportiva«, sinalan os nacionalisatas.
Aseguran que a veciñanza desta parroquia «ten mostrado o seu fondo malestar porque un lugar reservado ao lecer, no que, ademáis, está asentado un monolito dedicado un veciño moi apreciado, e que agora está abandonado, nadando no medio do lixo«.
Afirman dende o BNG que como resposta a estas queixas, «o Concello de Oia decidiu iniciar os trámites para reconverter o mesmo lugar no punto limpo oficial, o que está provocando a protesta xeral da veciñanza de Mougás, que non ve como lugar acaído polos inconvenientes que lles ocasionaría».
O BNG local comprendo o malestar veciñal e móstralles o seu apoio. «Consideramos que o que precisamente levan anos pedindo é xustamente o mesmo que os veciños: resolver o vertido e tratamento de dos residuos sólidos sen ocasionar prexuízos e instan o Concello a que deixe a imposición e inicie un proceso de diálogo para ver que solucións poden ofrecerse e, se a escollida require a instalación dun punto limpo, que se localice nun lugar consensuado e que non perxudique á poboación», rematan.