O Concello de Vigo renderá unha homenaxe permanente á escritora e xornalista viguesa Begoña Caamaño dando o seu nome á nova praza que conecta a peonil do Calvario coa rúa San Roque.

O anuncio foi realizado este venres polo alcalde de Vigo, Abel Caballero, durante a inauguración da exposición “Begoña Caamaño no Calvario vigués”, unha mostra dedicada á memoria da autora, que naceu neste barrio da cidade.

Durante o acto, Caballero destacou a importancia de preservar o legado da escritora e asegurou que “merece memoria eterna”, motivo polo que o novo espazo público levará o seu nome.

O rexedor explicou que a praza forma parte da transformación urbanística impulsada polo Concello nos últimos anos para conectar a rúa Urzáiz con San Roque a través dun novo espazo peonil que definiu como unha “nova praza fermosísima”. Segundo afirmou, o obxectivo é que a autora “permaneza na memoria para sempre”.

A exposición inaugurada este venres na peonil do Calvario está composta por seis paneis con ilustracións, fotografías antigas e fragmentos do libro A nena que perdeu un zapato na lama, obra do escritor Ramón Nicolás editada por Editorial Galaxia. O volume recupera a infancia e os primeiros anos de Begoña Caamaño no barrio do Calvario, onde viviu ata os doce anos.

A mostra foi comisariada polo propio Ramón Nicolás e coordinada por Xesús Domínguez Dono. O deseño e a maquetación estiveron a cargo de Hayat Husein, mentres que as ilustracións foron realizadas por Carlos Gallego, quen tamén asina a parte gráfica do libro.

Para a elaboración da exposición contouse coa colaboración do arquivo fotográfico da Asociación de Veciños do Calvario, así como co Arquivo Begoña Caamaño e o arquivo da Editorial Galaxia.

Na súa intervención, Caballero puxo en valor a figura da homenaxeada definíndoa como “unha muller extraordinaria e cunha capacidade literaria fantástica”. Ademais, reflexionou sobre os cambios experimentados pola cidade desde a infancia da autora e sinalou que as cidades van “cambiando á velocidade que a sociedade avanza”.

Pola súa banda, o director de Galaxia, Xosé Manuel Soutullo, explicou que a exposición nace coa intención de achegar a figura de Begoña Caamaño á veciñanza do Calvario, o barrio que marcou a súa infancia.

Ramón Nicolás agradeceu a colaboración das institucións implicadas e expresou a súa satisfacción pola homenaxe, que cualificou como “un agasallo”. Tamén destacou a participación do alumnado do IES Castelao na iniciativa.

A irmá da autora, Beatriz Caamaño, agradeceu o traballo desenvolvido para facer realidade tanto a exposición como o libro e subliñou a relevancia de que “as novas xeracións” poidan coñecer a vida e a obra da escritora.

Na inauguración participaron tamén Carmela Silva, o concelleiro de Cultura Gorka Gómez, representantes da Asociación de Veciños do Calvario e María Pereira, entre outras persoas vinculadas ao proxecto cultural.