A Entidade Local Menor de Camposancos acolle e triplica a súa poboación con centos de turistas ao chegar o verán.

A súa situación estratéxica na desembocadura do Miño, fai de Camposancos un lugar moi visitado polo turismo, ademais de ser paso do Camiño Portugués pola Costa.

A parte das súas praias e paisaxe, Camposancos conta ao longo de todo o ano cun número importante de actividades realizadas en colaboración coa veciñanza que fan deste pobo un lugar singular moi visitado, tanto no verán coma no inverno.

«Pero non todo é fermosura, a estrada da circunvalación que conecta Camposancos coa Guarda resulta moi arriscada  para os desprazamentos a pé. Os numerosos peóns que a utilizan teñen que camiñar pola calzada, porque non hai sitio para eles. A Xunta de Galicia non cumpre coas súas obrigas e a Entidade Local Menor vese na obriga de desbrozar cos seus propios medios diante do abandono da Xunta«, sinala a Presidenta da Entidade Local Menor, Mercedes Martínez.

Estamos moitas veces a saltar ao medio da maleza para esquivar os coches e en moitas ocasións teñen que parar os coches cando hai un viandante e se atopan dous vehículos de fronte. A falta dunha senda peonil que una Camposancos coa Guarda, é  unha demanda constante da veciñanza e dos que nos visitan”, comenta Mercedes Martínez.

Ante esta situación, a Entidade Local Menor amosa o seu descontento «e insta unha vez máis á Xunta de Galiza a dar solucións, despois de reiteradas veces de solicitalo por escrito, telefonicamente e incluso facer manifestacións relevantes», apunta.