Miriam Martinez e Pedro Pereira na sede do Consorcio Zona Franca

Desde o BNG tivo reunións coa Zona Franca, coa Asociación Veciñal San Salvador e con representantes da veciñanza do polígono residencial de Torneiros, coa Xunta de Montes, así como con asociacións de transportistas. Tras estas xuntanzas, «queremos amosar a nosa preocupación, compartida cos distintos colectivos, ante a falta de información dun proxecto que pode supor un alto custo social e ambiental para O Porriño«, din.

O centro de servizos que Zona Franca pretende construír en Torneiros está «pensado como unha grande área de descanso dotada de equipamentos para dar servizo ás persoas profesionais do transporte. As máis 25 hectáreas anunciadas para a súa construción non teñen parangón na Galiza para unha infraestrutura destas características. Un proxecto opaco e sobredimensionado que non conta a día de hoxe co pertinente estudo de necesidades. O espazo que se pretende ocupar afecta pola súa proximidade tanto a vivendas particulares como ao polígono residencial de Torneiros. Ocuparíanse tamén terreos inundábeis e bosques de ribeira do río Louro, e os seus regos, hábitats de conservación prioritaria para a Unión Europea«, apuntan os nacionalistas.

Dende o BNG indican que son coñecedores de que a demanda do sector do transporte de contar cun lugar para poder estacionar e descansar na contorna de Vigo é real e necesaria para dignificar a profesión e evitar molestias á veciñanza, «mais non nos parece que a alternativa escollida sexa acaida, tanto pola súa localización como pola súa dimensión. Entendemos debéranse estudar alternativas que non precisen degradar máis o territorio. Torneiros, unha parroquia afectada tanto pola presenza de industria química e lindano, como polas liñas de alta tensión e vías de comunicación que a atravesan, non pode ser de novo a sacrificada nunha operación destas dimensións. Desde o Bloque defendemos tamén protexer o Louro e o seu ecosistema, altamente afectado polo desenvolvemento industrial descontrolado do pasado mais que ten amosado un poder rexenerativo que o ten que converter, coa protección necesaria por parte das administracións públicas, no pulmón verde que O Porriño precisa».