A artista plástica Doa Ocampo «Doa Oa», pinta esta semana un mural de 4 metros no campo de fútbol do Alivio.
A acción forma parte da campaña «Mulleres en Acción: Violencia Zero», promovida pola Deputación de Pontevedra, coa colaboración, neste caso, do Concello de Tomiño.
O mural, titulado «Xuntas sanamos», é un homenaxe -segundo explica a autora- ás mulleres menciñeiras e sanadoras, que transmiten o seu poder e coñecemento de xeración en xeración, e que foron duramente perseguidas. No traballo aparecen varias plantas medicinais, coma a ruda ou a beladona.
A artista Doa Oa naceu en Sober (Lugo) en 1986, aínda que reside en Ferreira de Pantón. É graduada en Belas Artes e técnica superior en fotografía e participou en múltiples proxectos nacionais e internacionais. É a primeira vez que traballa no Baixo Miño.
O acto central da campaña terá lugar o vindeiro martes 14 de maio ao mediodía, no campo de fútbol do Alivio, aínda que estaba programado inicialmente para mañá mércores.