O BNG insta a Xunta e Concello a garantir, con urxencia, o servizo de comedor para o CRA Antía Cal de Gondomar. O goberno da Xunta volve «ignorar ás familias do alumnado de infantil do colexio rural: nin lles dá o servizo para as crianzas, nin facilita que poida prestalo o Concello e, o Goberno local incumpre as promesas electorais e traslada ás familias que a solución vai para longo».

“A dez días do inicio de curso, nin está garantido o servizo de comedor para o colexio rural nin está rematado o arranxo da súa aula de Couso. Xunta e Concello volven desatender as súas competencias e deixan tiradas as familias”, denuncia a Portavoz Municipal do BNG, Manuela Rodríguez.

Dende o BNG apuntan que «malia que a competencia de prestación do servizo de comedores escolares lle corresponde á Xunta de Galiza, segundo fontes municipais a Administración educativa galega négase a se poñer en contacto co goberno local de Gondomar para dar solución ás familias do alumnado do CRA Antía Cal».

Así, en marzo deste ano, durante unha concentración das familias para demandar o comedor, «o Alcalde manifestoulles que levaban dende novembro de 2022 agardando pola resposta da Xunta. E na reunión mantida coas familias o pasado mes de agosto, desde o goberno local afirman que seguen sen reposta da Xunta», afirman os nacionalistas.

«E vergoñento -din- que malia o Decreto da Xunta de Galiza polo que se regulan os comedores escolares recolla que a Administración educativa debe potenciar que os centros ofrezan servizos complementarios, como o comedor escolar, co fin de atender as novas demandas sociais’, tamén aquelas que constitúen un importante instrumento para a conciliación da vida laboral e familiar, a Consellaría de Educación decida abandonar ás familias». 

No mes de abril, en plena pre-campaña das eleccións municipais, Paco Ferreira afirmou nos medios de comunicación que o Concello preparaba un comedor escolar para o CRA, na vivenda anexa á aula de Peitieiros, e declaraba que ‘as obras poderían executarse en dous meses, durante o verán. Aínda que o daquela candidato a alcalde afirmaba que a intención era asinar un convenio coa Consellería de Educación para a axuda económica para as obras e para xestión do servizo de comedor a través do catering, tamén recalcaba que ‘se a Xunta non arrima o ombro, o Concello asumirá o proxecto’. “Mais todo quedou en promesas electorais”, lamenta Rodríguez.

Os nacionalistas aseguran que o Goberno local tampouco cumpriu o seu compromiso de arranxar a aula de Couso antes do inicio de curso. «Así, a día de onte estaba aínda pola metade a substitución do chan da aula de clase e aínda non hai data prevista para acometer o arranxo da aula denominada ‘de movemento’ nin da entrada».

Posición e accións do BNG

Manuela Rodríguez asegura que o BNG seguirá a loitar para «frear o intento da Xunta do Partido Popular de acabar cos colexios rurais agrupados e a derivación do alumnado de educación infantil desas aulas parroquiais a colexios de primaria, e seguirá a defender non só a restitución do servizo na aula de Peitieiros e a ampliación do mesmo as aulas das parroquias de Chaín, Couso, Morgadáns e Vilaza, senón tamén a pervivencia do propio CRA. Así mesmo, manteremos a demanda das aulas matinais en todos os centros educativos como outro servizo esencial para a conciliación».

E por iso que, ademais dunha iniciativa parlamentar para “esixir o mantemento do servizo de comedor dun goberno galego que deserta das súas competencias”, presentará unha iniciativa a nivel municipal para “esixir medidas dun goberno local que nin lle planta cara á Xunta nin mostra capacidade de dar solucións propias”, indica a edil nacionalista.