O Concello de Gondomar, a editorial Galaxia e o Instituto de Estudos Miñoráns convocan as persoas interesadas a asistiren ao acto de entrega do XIV Premio de Poesía Victoriano Taibo, galardón que recaeu no poeta ourensán Javier Rodríguez González polo poemario titulado Xeración (Breve tratado de males inespecíficos).
O xurado valora que a obra constitúe a crónica dunha xeración que se trascende a si mesma, chegando a expresar un auténtico manifesto contra a cultura da cancelación na medida en que a memoria, tamén a recente, marca o momento actual e proxéctase nun diálogo cara ao futuro. O poemario contén un alto interese histórico-cultural, ao mesmo tempo que se expresa cun léxico depurado e un ritmo áxil, ofrecendo unha proposta poética do devalar da existencia.
A obra gañadora será publicada na colección Dombate da Editorial Galaxia, onde a organización deséxalle o mesmo éxito que «Antese», de Arancha Nogueira, poemario gañador do ano anterior, que xa vai pola segunda edición. A entrega do premio e a presentación do libro, editado por Galaxia, terá lugar o día 22 de abril de 2023. O acto será presentado e conducido por Pedro Rodríguez, director de Teatro do Ar. O premio está dotado con 4000 € e unha peza escultórica, obra do artista miñorán Fino Lorenzo, fabricada desinteresadamente pola carpintería Meixoeiro. Neste evento cultural intervirán o alcalde de Gondomar, Francisco Ferreira, e representantes da Editorial Galaxia e do Instituto de Estudos Miñoráns.
O autor
Javier Rodríguez González naceu en Ourense en 1983 e é licenciado en Filoloxía Hispánica pola Universidade de Santiago de Compostela e diplomado en Ciencias Relixiosas pola Universidade Pontificia de Salamanca. Funcionario de carreira, traballa desde hai anos como profesor de Ensino Secundario no IES Mariano Quintanilla (Segovia). No seu libro Preludio a la ceguera (Eurisace, 2014) recóllese gran parte da súa produción escrita en galego e castelán. Tamén colaborou con poemas, recensións e textos ensaísticos en revistas como «Encrucillada», «Pedra de Muíño», «O Cobaia», «Rudesindus», ou «Auriensia». En galego ten gañado varios premios, como o VII Certame Literario Concello de Ames (2010), o XXVI Certame de Poesía Feliciano Rolán (2012), o VI Certame Literario Terras de Chamoso (2013), o Certame a Pipa Alta Montaña Luguesa (2013), VII Certame de Poesía Manuel Leiras Pulpeiro (2019), III Premio de Poesía Eduardo Pondal (2021) e o V Premio de Poesía Eloy Lozano (2021). En castelán destaca o Premio Internacional de Poesía Miguel Hernández-Comunidad Valenciana (2021).
Victoriano Taibo
Poeta das Irmandades da Fala, foi unha figura sobranceira nos dous primeiros terzos do século
- Mestre de profesión, tivo unha importante actividade cultural. Participou moi activamente no devandito movemento das Irmandades. Foi membro do Seminario de Estudos Galegos, da Real Academia Galega e do Instituto de Estudos Históricos do Minho. Á parte dunha abundantísima obra espallada, publicou en vida os poemarios Abrente (1922) e Da vella roseira (1925) e a obra narrativa Da agra aberta, contos e lendas (1956); deixou inéditos dous volumes de poemas, Abicedo e Cabrinfollas, editados por Armando Requeixo e publicados baixo o selo da Editorial Follas Novas en 2008; neste mesmo ano recibiu unha homenaxe en Morgadáns, lugar onde exerceu a súa docencia durante 20 anos, organizada polo IEM, que con tal motivo reeditou Da agra aberta e publicou unha Revista monográfica sobre o personaxe que recolle interesantes aspectos da súa vida e obra, coa participación dun nutrido grupo de persoas do mundo da cultura.
