Os populares piden esta sesión, ante o rexeitamento do BNG a debater a súa proposta no recente pleno ordinario, para que o Concello “abandone a súa deixadez na ampliación deste servizo e aproveite a oportunidade” que brinda o organismo provincial para dotar deste servizo básico municipal a milleiros de veciños

O PP lamentou os poucos avances nesta materia nos catro mandatos do BNG e lembra que carecen desta rede de sumidoiros as contornas de Piñeiro, Amorín, Currás, Sobrada, Taborda, Barrantes, Pinzás, Carregal, Tebra e incluso parte de Forcadela

O grupo municipal do PP de Tomiño vai impulsar un pleno extraordinario para solicitar o deseño e execución dun plan integral de extensión do servizo de saneamento a unha decena de zonas do Concello que carecen de sumidoiros ao abeiro do Plan Provincia Extraordinaria que vén de impulsar a Deputación de Pontevedra e que permitirá que se realicen investimentos por ata 1,2 millóns de euros no municipio.

Os populares piden este pleno, ao que teñen dereito ao contar con 6 dos 17 dos concelleiros da corporación, ante o rexeitamento inexplicable do BNG a debater a súa proposta na recente sesión ordinaria con excusas peregrinas sobre prazos e co obxectivo de que o goberno nacionalista “abandoe a súa absoluta deixadez na implantación universal deste servizo e aproveite a oportunidade de investimento” que brinda o organismo provincial, xa que a contía é importante e, se ben non permitiría completar a rede, si que serviría para ofrecer esta cobertura a milleiros de veciños que carecen de sumidoiros.

O PP local, a través da súa voceira, Mónica Otero, lamentou os poucos avances nesta materia ao longo dos catro mandatos de gobernos do BNG e revelou que, na actualidade, hai importantes carencias ou eivas no servizo de saneamento en contornas como Piñeiro, Amorín, Currás, Sobrada, Taborda, Barrantes, Pinzás, Carregal, Tebra e incluso algunha zona de Forcadela.

“Non é de recibo que a maioría dos veciños de Tomiño non teñan este servizo no ano 2024 malia que é básico e se trata dunha competencia municipal e ademais, ante a habitual excusa de que non teñen fondos suficientes, agora acabáselle esta xustificación coa proposta de investimentos extraordinarios da Deputación, que nos ofrece unha opción histórica de adicar 1,2 millóns de euros, cunha achega provincial de ata 900.000 euros, a estas actuacións”, manifestou a concelleira.

A edil agarda que o BNG “teña sensibilidade” con esta petición e coas demandas de milleiros de veciños de Tomiño “e opte por aceptar a nosa razoable proposta en vez de decidirse por algún dos seus habituais, ineficientes e caros proxectos faraónicos, así que imos ver se apostan polo sentido común e polas necesidades básicas dos tomiñeses ou tiran por algunha ocorrencia que serve para pouco máis que satisfacer o seu ego e cumprir co seu sesgo ideolóxico, que é o que nos tememos vista a actitude coa que despacharon a nosa moción no derradeiro pleno”.

Finalmente, o PP tomiñés cre que este proxecto de saneamento cumpre con todos os parámetros esixidos pola Deputación no seu Plan Provincia Extraordinaria, “xa que é indubidablemente estratéxico, porque permitiría completar un servizo básico, fomentaría a igualdade de atención aos veciños para que todos contasen con sistemas de depuración, permitiría preservar o medio ambiente e o territorio evitando os vertidos de augas residuais e podería contribuír a mitigar ou conter as dañinas pragas de moscas que aparecen nos verán ao reducir os focos de residuos”.