A responsábel local do BNG de Gondomar ven de presentar no Concello unha solicitude para ampliar a relación dos espazos públicos que se poñen ao dispor das candidaturas participantes diante das convocatorias electorais do 28 de abril e 26 de maio.
Trátase de facilitar ás formacións políticas a posibilidade de convocar actos públicos de distinto formato e dimensión durante as campañas electorais, evitando condicionantes como as barreiras arquitectónicas(Casa da Cultura), actividade cultural (Auditorio Lois Tobío) ou condicións acústicas e de espazo inadecuadas (Pavillón Municipal), que presenta a oferta que se ven facendo até agora, sendo ademais todos eles, lugares pechados.
A solicitude do BNG lembra a necesidade de facilitar unha relación de espazos o máis ampla e acaída posíbel, e propón incluír a sala de actos do Centro Neural e, cando menos, algunha das prazas públicas da vila que permitan desenvolver actos ao aire libre e faciliten o achegamento da mensaxe política á veciñanza.
Esta mesma petición xa foi presentada para os procesos electorais de 2015 e 2016 máis nunca houbo resposta nin rectificación por parte do goberno municipal. O BNG lembralle ao Alcalde que aínda está a tempo de modificar a oferta diante da Xunta Electoral.
O BNG insta tamén a revisar a ubicación das mesas de votación
O BNG insta ao concello a revisar a idoneidade da ubicación das mesas de votación nalgúns locais electorais. Tense detectado nalgún caso que se atopan en lugares con barreiras arquitectónicas (escaleiras) que dificultan o exercicio do voto a persoas con mobilidade reducida, en zonas elevadas (escenarios) con risco de caídas, ou en espazos pouco acondicionados para pasar alí tantas horas as persoas que forman parte das mesas (pavillón).