O BNG de Nigrán asegura que «o PP non contempla a renovación urbana do deteriorado centro da Ramallosa, desbotando a emenda coa que o BNG pretendía que a Xunta de Galicia reservase 300.000 euros para acometela, coa humanización do tramo da vía de titularidade autonómica PO 552 que atravesa a poboación».
«A falta de mantemento, –din-, así como a ausencia dende fai décadas da reposición das beirarrúas, deixa un tramo de estrada inhóspito e degradado no que tradicionalmente é o centro comercial e de servizos do Val Miñor».
Esta travesía conta con beirarrúas moi estreitas que dificultan enormemente o tránsito peonil pola mesma, o cal unido a alta densidade de circulación, impide que sexa unha rúa atractiva comercialmente, «amosando locais baleiros e un aspecto xeral de abandono».
«Por iso, resulta imprescindible que o Goberno galego, a quen pertence a estrada, aborde a súa urbanización, inda que sexa en concurso co concello, como responsable dos servizos urbanos que deben ser renovados«, explican os nacionalistas.
Dende o BNG propoñen a eliminación do estacionamento neste tramo de Manuel Lemos, ao obxecto de poder gañar espazo para ensanchar as beirarrúas. Ao mesmo tempo, «isto fai necesario a apertura do irregularmente pechado aparcamento da piscina, que debe abordar dunha vez o Goberno municipal, para solucionar os problemas de estacionamento no en torno», indican.
Os nacionalista matizan que para poder desenvolver axeitadamente unha actuación ambiciosa amósase como imprescindible a colaboración entre Concello e Xunta, que debería concretarse nun convenio para o financiamento das obras.
«Nós instamos ao Alcalde de Nigrán a redactar unha proposta e o seu traslado formal ao Goberno galego, a diferencia do que fixo coa rúa Otero Pedrayo, da que rematou solicitando o traspaso da súa titularidade nun estado lamentable no que aínda continúa«, remata Xavier Rodríguez, Responsábel local do BNG de Nigrán.